Páginas vistas en total

Follow by Email

lunes, 23 de abril de 2012

... y por munchos años

   Debió ser por mayu de 2004. Yo taba a piques de presentar el mio primer y aventuráu trabayu discográficu, él tenía nel so skyline mental un primer llibru de poemes. Xulio Viejo plantegara facer una "Selmana de les Lletres" alternativa nel Campus del Milán con xente mozo y prometedor na lliteratura y na música asturiana y ellí nos alcontramos un xueves pola tarde. 

  Anque la primer impresión nun foi mui definitiva, esi mesmu xueves pola nueche alcontrámonos -casualidá noctívaga- nel recién abiertu Chigre "El Naranco" d' Uviéu. Falamos muncho, bebimos más y acabamos cantando "Estadio Azteca" de Calamaro como si la fuera a prohibir Gabino de Lorenzo a la mañana siguiente. Taba claro: ñaciera l´amor. 

  Siempre digo que la nuesa ye una amistá que se foi faciendo fuerte a golpes de lluna y copa; de nueche en nueche, ensin quedada previa la mayoría de les veces. Los años foron pasando y faciéndonos radicales y dependientes -tolo que tenemos vivío ye tan bueno que nun se puede contar-. Porque, a estes altures, como poco soi dependiente de Pablo Texón. Y voi selo por munchos años.

  La vida tien tantos caprichos qu´esti cantante -el que meyor escribe- tuvo que nacer un 23 de abril, cuándo sinón. Y a min enciéndeseme los güeyos cuando pienso nesta serendipia. Qué cabrón, teníalo preparao.
   

No hay comentarios: